tum agar saath dene kaa waadaa karo
maiN yooN hii mast naGmeN luTaataa rahooN
tum mujhe dekh kar muskuraatii raho
maiN tumheN dekh kar geet gaataa rahooN
kitane jalawe fizaa_oN meN bikhare magar
maiN ne ab tak kisii ko pukaraa nahiiN
tum ko dekhaa to nazareN ye kahane lagiiN
hamko chehare se haTanaa gawaaraa nahiiN
tum agar merii nazaroN ke aage raho
main har ek shay se nazareN churaataa rahooN
maiN ne KhwaaboN meN barasoN taraashaa jise
tum wahii sang-e-maramar kii taswiir ho
tum na samajho tumhaaraa muqaddar hooN maiN
maiN samajhataa hoon tum merii taqadiir ho
tum agar mujh ko apanaa samajhane lago
maiN bahaaroN kii mahafil sajaataa rahooN
maiN akelaa bahut der chalataa rahaa
ab safar zindagaanii kaa kaTataa nahiiN
jab talak ko_I ra.ngiiN sahaaraa naa ho
waqt kaafir jawaanii kaa kaTataa nahiiN
tum agar ham_qadam ban ke chalatii raho
maiN zamiiN par sitaare bichhaataa rahoon
No comments:
Post a Comment